Անցանկալի մազերը մշտական սթրեսի աղբյուր են յուրաքանչյուրի համար, սակայն դրանք առավել տհաճ խնդիր են դառնում, երբ ի հայտ են գալիս դեմքին: Ներկայում գոյություն ունեն այս խնդրի դեմ պայքարի բազմաթիվ մեթոդներ, որոնք, սակայն, կա՛մ չափազանց ցավոտ են, կա՛մ թանկարժեք են, կա՛մ անարդյունավետ: Այնուամենայնիվ՝ քչերին է հայտնի, որ կան նաև անցանկալի մազերից ազատվելու շատ ավելի հասանելի բնական միջոցներ, որոնք բացարձակապես անցավ են և պարբերաբար կիրառելու դեպքում կօգնեն հասնել հիանալի արդյունքի:
Ձեր ուշադրությանն ենք ներկայացնում մազահեռացման մի քանի եղանակ, որոնք կօգնեն խնայել միջոցներն ու ազատվել մազերից՝ խուսափելով տհաճ զգացողություններից:
Վարսակ և բանան
Բանանի խյուսին ավելացնել վարսակի փաթիլներ, լավ խառնել և ստացված զանգվածը հաստ շերտով քսել խնդրահարույց հատվածներին՝ մերսելով մաշկը ժամացույցի սլաքի շարժման ուղղությամբ: Թողնել դիմակը 20 րոպե, այնուհետև լվացվել սառը ջրով:
Նարդոսի և թեյի ծառի եթերայուղեր
Խորը տարայի մեջ խառնել նարդոսի և թեյի ծառի եթերային յուղերը, այնուհետև ստացված խառնուրդը բամբակյա սկավառակի միջոցով քսել խնդրահարույց հատվածներին: Այս պրոցեդուրան հարկավոր է կրկնել օրական 2-3 անգամ առնվազն երեք ամիս:
«Գրին Գրեմ» փոշի և վարդի ջուր
«Գրին Գրեմը» շատ տարածված միջոց է և հաճախ է կիրառվում այուրվերդյան բժշկության մեջ: Հարկավոր է փոշուն խառնել վարդի ջուր, այնուհետև ստացված մածուկին ավելացնել նաև մի քանի կաթիլ կիտրոնի հյութ և լավ խառնել: Քսել դիմակը անցանկալի մազերով պատված հատվածներին և թողնել 20-25 րոպե կամ մինչև այն չորանա: Դիմակը հարկավոր է քսել մատներով՝ նրբորեն մերսելով մաշկը: Այս պրոցեդուրան պետք է կրկնել շաբաթական 3-4 անգամ:
Սոխ և ռեհան
Սոխն ու ռեհանի տերևները մանրացնել մինչև ստացվի մածուցիկ զանգված, քսել այն դեմքի մազածածկ հատվածներին, թողնել 20-25 րոպե և լվացվել գոլ ջրով: Այս պրոցեդուրան հարկավոր է կրկնել շաբաթական 3-4 անգամ երկու ամիս:
Մեղր և շաքարավազ
Խորը տարայի մեջ խառնել մեղրը, շաքարավազն ու ջուրը, այնուհետև դնել խառնուրդը միկրոալիքային վառարանի մեջ և տաքացնել 30 վայրկյան, որպեսզի շաքարավազը լուծվի: Ստացված մածուկը մի փոքր սառչելուց հետո հարկավոր է քսել մազածածկ հատվածներին, ծածկել մաքուր կտորով և մի քանի վայրկյան անց մազերի աճին հակառակ ուղղությամբ կտրուկ ձգել կտորը՝ հեռացնելով անցանկալի մազերը:
