Առողջ, գեղեցիկ ու փայլուն մաշկ ունենալու մասին շատերն են երազում, սակայն նման անթերի մաշկ ունենալու համար հարկավոր է նաև բավականաչափ ջանք գործադրել: Հատկապես խնդրահարույց կարող է լինել չոր մաշկը, որը շատ զգայուն է արտաքին միջավայրի անբարենպաստ պայմանների նկատմամբ և հեշտությամբ է շերտազատվում:
Չոր մաշկի դեպքում հարկավոր է անպայման հետևել մաշկի խոնավությանն ու սնուցել այն անհրաժեշտ սննդարար նյութերով, որոնք կօգնեն խուսափել վաղաժամ ծերացումից: Նման դեպքերում կարելի է կիրառել հատուկ դիմակներ, սակայն դրանք ոչ միշտ են բավական արդյունավետ ու անվնաս լինում, ուստի կողմնակի բարդութուններից խուսափելու և ցանկալի արդյունքին հասնելու համար մասնագետները խորհուրդ են տալիս պատրաստի կոսմետիկ միջոցները փոխարինել բնական թարմ դիմակներով:
Չոր մաշկի համար լավագույն լուծումը կլինեն բնական բաղադրիչներից պատրաստված խոնավացնող դիմակները, իսկ նման դիմակների թվում ամենաարդյունավետ ու հասանելի միջոցներից են հազարի թերթիկներով պատրաստվող դիմակները: Ձեր ուշադրությանն ենք ներկայացնում դրանցից երկուսի բաղադրատոմսը, որոնց շնորհիվ հնարավոր կլինի պահպանել մաշկի թարմ ու առողջ տեսքը և խուսափել մաշկային տարբեր խնդիրներից:
1-ին բաղադրատոմսը.
Այս դիմակն օգնում է արդյունավետ կերպով խոնավացնել մաշկն ու ազատվել մանր կնճիռներից՝ պահպանելով թարմ ու երիտասարդ տեսքը:
Բաղադրությունը.
- մանր կտրատած հազարի թերթիկներ,
- 1 ճաշի գդալ բուսական յուղ,
- 1 թեյի գդալ կիտրոնի հյութ:
Օգտագործման եղանակը.
Հարկավոր է բոլոր բաղադրիչները խառնել, քսել խառնուրդը մաշկին, թողնել որոշ ժամանակ, այնուհետև լվացվել մաքուր ջրով:
2-րդ բաղադրատոմսը.
Հազարի տերևներով դիմակի այս տարբերակը կօգնի վերականգնել մաշկին առողջ երանգն ու կխոնավացնի այն:
Բաղադրությունը.
- մանր կտրատած հազարի թերթիկներ,
- 2 ճաշի գդալ թթվասեր:
Օգտագործման եղանակը.
Հարկավոր է բաղադրիչները խառնել, քսել խառնուրդը մաշկին, թողնել որոշ ժամանակ, այնուհետև լվացվել մաքուր ջրով:
