Ամերիկյան «Տանը մենակ» ֆիլմի աստղ Մակոլեյ Կալկինը վերջին հարցազրույցներից մեկում խոստովանել է, որ շուրջ 30 տարի չի շփվում հոր՝ դերասան Քիթ Կալկինի հետ, որին բնութագրել է որպես «վատ մարդ»:
Ինչպես գրում է Daily Mail-ը, Մակոլեյ Կալկինը համաշխարհային ճանաչում է ստացել 10 տարեկանում, երբ 1990-ին նկարահանվել է «Տանը մենակ» ֆիլմում: Արդյունքում նա փառքի և հաջողության հարցում արագ ստվերել է հորը, ինչը, ըստ Կալկինի, հոր մոտ խանդ է առաջացրել:
1995-ին տղայի ծնողները բաժանվել են՝ կատաղի պայքար սկսելով աստղային և մեծ գումարներ վաստակող որդու խնամակալության իրավունքի համար:
Այժմ 44-ամյա Կալկինը պատմել է, որ ո՛չ ինքը, ո՛չ էլ մյուս քույր եղբայրները չեն շփվում «նարցիսիստ» և «բռնակալ» հոր հետ: Դերասանի խոսքով՝ հայրն իր համար եղել է օրինակ, որին չպետք է նմանվել սեփական երեխաներին դաստիարակելու հարցում:
«Նրա մասին իմ ամենավաղ հիշողություններից մեկն այս էր. «Երբ մեծանամ, չեմ պատրաստվում այդպիսին լինել իմ երեխաների հետ»», – նշել է Կալկինը:
Կինոաստղի խոսքով՝ ինքն առհասարակ արտաքնապես նման չէր հորն ու վաղ տարիքում միանգամից հաջողություն է ունեցել շոու բիզնեսում, ինչը հոր համար հաճելի չէր:
«Կարծում եմ՝ նա զայրացած էր ինձ վրա դրա պատճառով։ Կարծում եմ՝ նա մի փոքր ատում էր ինձ դրա համար, և այդ պատճառով էլ կոպիտ էր ինձ հետ», – նշել է Կալկինը։
