«Գահերի խաղը» վերադառնում է մեծ էկրան. մշակվում է նոր ֆիլմ

«Գահերի խաղը» (Game of Thrones) կինոնախագիծը պաշտոնապես մեկնարկել է՝ ստանալով նոր վերնագիր, որն ավելի հստակ է դարձնում ֆրանշիզի ապագա ծրագրերը։ Ֆիլմը կոչվելու է «Գահերի խաղը. Էյգոնի նվաճումը» (Game of Thrones: Aegon’s Conquest)։ Սցենարը գրում է Բո Ուիլիմոնը, ով հայտնի է որպես Netflix-ի «Խաղաթղթե տնակ» (House of Cards) սերիալի հեղինակ և Disney+-ի «Անդոր» (Andor) նախագծի սցենարիստ։

Warner Bros.-ը և HBO-ն դիտարկել են Էյգոն I Թարգարիենի կողմից Վեստերոսի նվաճման պատմության մի քանի տարբերակ։ Գրող Ջորջ Ռ. Ռ. Մարտինն այս իրադարձությունների մասին պատմել է իր «Կրակ և արյուն» (Fire & Blood) գրքում, որը ներկայացնում է Թարգարիենների դինաստիայի գեղարվեստական պատմությունը։ Անցյալ տարի հաղորդվել էր, որ սցենարիստ Մեթսոն Թոմլինը («Տերմինատոր. Zero», «Բեթմեն. Մաս 2») նույնպես աշխատում էր նախագծի նախնական տարբերակի վրա։ Նա նշել էր, որ այս նախագիծը նման է պատմական մեծ կերպարների՝ Նապոլեոնի կամ Ալեքսանդր Մակեդոնացու մասին ֆիլմեր ստեղծելուն։

Արդեն որոշակի մանրամասներ են հայտնի «Էյգոնի նվաճման» հնարավոր սյուժեի վերաբերյալ, այդ թվում՝ այն վարկածը, որ Էյգոնն ունեցել է մարգարեական տեսիլքներ և փորձել է միավորել Վեստերոսի յոթ թագավորությունները՝ սպասվող աղետից պաշտպանվելու համար։