Հոլիվուդյան աստղ Անջելինա Ջոլին պատրաստվում է հրաժեշտ տալ Լոս Անջելեսի իր շքեղ առանձնատանը, որը կառուցվել է 1913 թվականին։
Ինչպես հաղորդում է People-ը, դերասանուհին պլանավորում է վաճառել անշարժ գույքը և մտածում է ԱՄՆ-ից տեղափոխվելու մասին։
Ըստ ներքին աղբյուրի՝ Ջոլին երբեք չի ցանկացել մշտապես ապրել Լոս Անջելեսում, բայց ստիպված է եղել մնալ նախկին ամուսնու՝ Բրեդ Փիթի հետ խնամակալության մասին համաձայնագրի պատճառով։ Զույգը, որը մեծացնում է վեց երեխա, պաշտոնապես ամուսնալուծվել է 2024 թվականի դեկտեմբերին՝ ութ տարվա դատական վեճից հետո։
Ասում են, որ Ջոլին պատրաստ է տեղափոխվել անմիջապես, երբ իր կրտսեր երկվորյակներ Նոքսը և Վիվիենը դառնան 18 տարեկան։ Հնարավոր ուղղությունների թվում են Եվրոպայի և Ասիայի երկրները։ Աստղը նախկինում բացատրել է, որ ձգտում է իր ընտանիքի համար ավելի շատ գաղտնիության և հանգստության.
«Երբ դու մեծ ընտանիք ունես, դու ուզում ես, որ նրանք ունենան անվտանգություն և խաղաղություն։ Աշխարհի այլ վայրերում ես գտել եմ մի մարդկայնություն, որը կարոտում եմ այստեղ՝ Լոս Անջելեսում»։
Պատմական առանձնատունը, որը Ջոլին գնել է 2017 թվականին 24,5 միլիոն դոլարով, ունի վեց ննջասենյակ, տասը լոգարան և ավելի քան 1000 քառակուսի մետր տարածք։ Չարլի Չապլինն ինքը նախկինում ապրում էր հարևանությամբ։
