Անքնությունը տարածված խնդիր է։ Հետազոտությունների համաձայն՝ աշխարհի չափահաս բնակչության մոտ 30% – ն ունենում է քնի խանգարումներ։ Շատերը քնելու համար դիմում են տարատեսակ դեղամիջոցների օգնությանը։ Մինչդեռ գիտնականներն արդեն պարզել են, որ քնի որակի վրա կարող է ազդել նաև մարդու սննդակարգը։
Ո՞ր սննդից պետք է հրաժարվել քնելուց առաջ
Առաջին հերթին երեկոյան պետք է հրաժարվել ճարպեր պարունակող մթերքներից՝ կարագ, ձկան յուղոտ տեսակներ, ճարպոտ միս, ընկույզ, խմորեղեն։
Դրանք դժվար են մարսվում, ինչը բերում է օրգանիզմի հոգնածության։ Դրա հետևանքով դժվար կքնեք, իսկ քնի մեջ անընդհատ շուռումուռ կգաք։
Երկրորդը՝ հնեցված դեղին պանիրներ են։ Դրանք պարունակում են թերամին՝ նյութ, որը գրգռում է ուղեղը և արգելակում մելատոնինի արտադրությունը, ինչը նպաստում է հանգիստ քնին։
Հաջորդը` սուր ու կծու համեմունքներ են: Դրանք աշխուժացնող հատկություն ունեն։ Ուսումնասիրությունները ցույց են տվել, որ երեկոյան ժամերին ընդունած կծու և սուր համեմունքներով սնունդը թույլ չի տալիս հանգիստ քնել, գիշերային քունը մակերեսային է լինում, և մարդը չի հասցնում հանգստանա:
Կոֆեին պարունակող մթերքները՝ սուրճը, թեյը, կոկա-կոլան և այլն, նույնպես անքնություն են բերում։ Սուրճն ու այլ կոֆեին պարունակող ըմպելիքները պետք է օգտագործել քնից առնվազն վեց ժամ առաջ: Եթե անգամ այս պարագայում վատ եք քնում, ապա պետք է մտածել առավոտվա սուրճից հրաժարվելու մասին։
Հայտնի հեռուստահաղորդավար Ելենա Մալիշևայի կարծիքով՝ սուրճից պետք է փորձել խուսափել նաև այն պատճառով, որ այն հոգեբանական ազդեցություն է թողնում և ունի միզամուղ հատկություն:
«Հնարավոր է` դուք քնելուց 20 րոպե անց արթնանաք, քանի որ զուգարան գնալու ցանկություն է առաջանում», – ասել է նա ռուսական Առաջին ալիքի եթերում:
Ի դեպ, հաշվի առեք, որ մուգ շոկոլադը ևս պարունակում է ոչ մեծ քանակությամբ կոֆեին, ինչը նույնպես քունը խանգարող, տոնուսը բարձրացնող միջոց է։ Եթե քնի հետ կապված խնդիրներ ունեք, շոկոլադ վայելեք քնելուց հինգ ժամ առաջ։
Ալկոհոլը և ծխախոտն ուղեղի գործունեության հզոր խթանիչներ են, որոնք խոչընդոտում են քնել: Երեկոյան խմած մեկ բաժակ գինին քնելու ցանկություն կբերի, և գիշերվա առաջին մասը լավ կքնեք, բայց հետո կարթնանաք գիշերվա կեսին, և երկրորդ մասը շատ անհանգիստ կքնեք`ալկոհոլի ազդեցության պատճառով:
Ինչպե ՞ս բարելավել քունը
Մի մոռացեք ապացուցված ժողովրդական մեթոդի մասին` տաք կաթ մեղրի հետ: Տատիկների բաղադրատոմսով այս ըմպելիքը խորհուրդ է տրվում խմել քնելուց առաջ: Կաթի բաղադրության մեջ առկա տրիպտոֆանն օգնում է սերոտոնինի՝ երջանկության հորմոնի նորմալ սինթեզին։
Մի բաժակ դդմի հյութը` մեղրով, նույնպես ստիպում է անքնությանը նահանջել և խորը քուն է բերում։ Բացի այդ, դդումի հյութը օգտակար է այտուցների, ճարպակալման դեպքում, պայքարում է հիպերտոնիայի դեմ: Կարող եք օգտագործել նաև հանգստացնող թեյեր, օրինակ, անանուխի և երիցուկի: Երիցուկի թեյի մեջ պարունակվող ամինաթթուները հանգստության և թեթևության զգացողություն են բերում:
Անանուխի թեյը ունի և՛ հանգստացնող, և՛ ցավազրկող հատկություն։ Անանուխը հանում է նևրոզը, լարվածությունը, ազատում անքնությունից։ Բայց այն խորհուրդ չի տրվում խմել քնելուց անմիջապես առաջ, այլ մեկուկես-երկու ժամ:
Քնից առնվազն չորս ժամ առաջ սննդարար ընթրիքներից հրաժարվելը նույնպես ապահովում է ավելի հանգիստ քուն:
