«Առաջին եթերին սկսնակի պես հուզված էի». Գայանե Ասլամազյանը՝ եթեր վերադառնալու, 2 նոր նախագծերի և լիարժեք երջանիկ լինելու մասին - Showbiz.am

«Առաջին եթերին սկսնակի պես հուզված էի». Գայանե Ասլամազյանը՝ եթեր վերադառնալու, 2 նոր նախագծերի և լիարժեք երջանիկ լինելու մասին

Արմենիա TV-ի լուսավոր ու պայծառ կերպարներից մեկը վերադառնում է եթեր. հեռուստադիտողը կրկին՝ 3 տարի անց,  հնարավորություն ունի էկրանին տեսնելու և վայելելու հաղորդավարուհի, դերասանուհի Գայանե Ասլամազյանին և ունկնդրելու նրա՝ այդքան եթերային և գեղեցիկ ձայնը: Վերադարձը դեպի սիրելի աշխատանք, ինչ խոսք, հուզիչ է նրա համար, բայց միևնույն ժամանակ անչափ հաճելի: ShowBiz.am-ին Գայանեն պատմել է ստեղծագործական դադարի՝ իր ճիշտ ու տեղին որոշման, այդ ընթացքում կարոտի, սակայն ամենն ամփոփելու, ինչպես նաև նոր նախագծերի մասին:

«Կարծում եմ, որ յուրաքանչյուր կին ինքն է ընտրում իր ուղին. ես այսպես թե այնպես պետք է վերադառնայի իմ աշխատանքին: Այն կինը, որ երբևէ աշխատել է,  որը կայացած է, չի կարող մշտապես հեռու մնալ այդ կյանքից: Ես կարծում եմ, որ ընտանիքն իր տեղն ունի, իսկ աշխատանքը՝  իր. ոչ մեկը  չպետք է տուժի կամ զիջի: Երբ դու գտնում ես գեղեցիկ բալանսը, այդ ժամանակ դու լիարժեք երջանիկ ես»,-ասում է Գայանեն և հավելում, որ մեկ վայրկյան անգամ չի զղջում իր ստեղծագործական դադար ունենալու որոշման մասին: Նա նշում է, որ իսկապես կար կարիք եթերային լռության և ստեղծագործական ուղու ամփոփման:

Նա  միանգամից 2 նոր նախագծում է հանդես գալիս: Առաջարկներն, իհարկե, մեծ ոգևորություն և հիացմունք են պատճառել հաղորդավարուհուն: Առաջին նախագծի առաջարկը Գայանեն ստացել է «Հորիզոն» հեռուստաընկերությունից, որի հետ համագործակցությունն առաջին անգամ է: Հաղորդման ընթացքում հաղորդավարուհին հանդիպում է հայտնի  մարդկանց հետ, փորձում բացահայտել նրանց  թե՛ որպես մարդ, թե՛ որպես մասնագետ: Իսկ նոր անձնակազմից ստացած ջերմ ու սիրալիր վերաբերմունքից նա շատ է շոյվել. «Պետք է ամենայն անկեղծությամբ  նշեմ, որ զգացված եմ այն վերաբերմունքի համար, որն անձնակազմը ցուցաբերեց  իմ նկատմամբ:  Տպավորություն է, որ երկար տարիներ աշխատել եմ նրանց հետ: Վստահ եմ,  որ այս ընկերությունը երկար ու ձիգ տարիների պատմություն կունենա, և ես մշտապես սիրով կհիշեմ այս ժամանակահատվածը»:

Երկրորդ առաջարկն արդեն հարազատ ու սիրելի  Armenia TV-ից է. «US Armenia-ի անձնակազմն ու նախագծերի պրոդյուսերները որոշում են կայացրել ինձ հրավիրելու նոր հեռուստասերիալում նկարահանվելու. անձնակազմն ինձ ծանոթ է, իսկ միջավայրն՝ անչափ հաճելի: Միշտ էլ ուրախալի  է վերադառնալ և աշխատել այն մարդկանց հետ, ում հետ արդեն ունես աշխատանքային փորձ»:

Նոր հեռուստասերիալում, որտեղ նկարահանվում է դերասանուհին, հանդես է գալիս հենց իր իրական անունով. «Խոստովանեմ, որ տարօրինակ է և զարմանալի այն փաստը, որ կերպարս էլ է Գայանե անունը կրում, և ես հուսով եմ, որ այն կսիրվի: Կին, ով բավականին դժվար կայացման շրջան պետք է անցնի, և որի ճակատագիրը պետք է շատերին հուզի»:

Գայանեի խոսքով՝  3 տարի է, ինչ դադարի մեջ է գտնվել, և կարոտն անսահման է հանդիսատեսի ու տեսախցիկի հանդեպ.  «Անկեղծ ասած, շատ կարոտել եմ  այս աշխատանքը, կարոտել եմ հանդիպումը իմ հանդիսատեսի հետ, արձագանքները յուրաքանաչյուր հարցազրույցից հետո:  Հուսամ, որ այն ինչ անելու ենք հիմա, հանդիսատեսի համար հաճելի կլինի և սպասված, իսկ առաջին եթերին սկսնակի պես հուզված էի. տարօրինակ զգացողություն էր, բայց պետք է ասեմ, որ շատ հաճելի: Այս տարիները անցան, ինձ տվեցին հետաքրքիր գույներ ու երանգներ, և այդ ամենը կարտացոլվի  արդեն եթերներում»:

Զրույցի վերջում Գայանեն  նշեց, որ ակնկալիքներն ու սպասումները մեծ են. «Հեռուստադիտողը յուրաքանչյուր շաբաթ կսպասի նոր հանդիպումների և նոր հյուրերի: Հուսամ, որ և՛ հաղորդումը, և՛ հեռուստասերիալը կլինեն սպասված և հաջողված, կվայելեն հասարակության ուշադրությունը, սերն ու ջերմությունը»,- եզրափակեց նա:

Հեղինակ՝ Կիմա Միրզոյան

 

ԲԱՑ ՉԹՈՂՆԵԼ

ԲԱՑ ՉԹՈՂՆԵԼ

post-image
ՇոուՆյուզ

«Չէի պատկերացնի, որ նման որակի գրառում կարող ես քեզ թույլ տալ». Գայանե Ասլամազյանը՝Գնել Սարգսյանի մասին

Դերասանուհի, հաղորդավարուհի Գայանե Ասլամազյանը ֆեյսբուքյան իր էջում գրել է․ «Գնել ջան, շնորհավորում եմ: Երևի թե քեզ համար կարևոր իրադարձություն...
Ավելին
post-image
ՇոուՆյուզ

«Հերոսական նովելներ»-ի կոմպոզիտորը՝ պատերազմի ընթացքում ստեղծագործելու մասին

Քանի դեռ կան պատերազմներ, մարդկային ողբերգությունները շարունակվելու են։ «Արմենիա» հեռուստաընկերությունը պատերազմի ընթացքում ներկայացրեց հեռուստադիտողներին  «Հերոսական նովելներ» բազմասերիանոց ֆիլմը, որի...
Ավելին