Նիհարելու համար քաղցր մթերքներից հրաժարվելը կարող է վատ հետևանքների հանգեցնել։ Ինչպես խուսափել դրանից` Sputnik ռադիոկայանի եթերում պատմում է բժիշկ–սննդաբան, սննդաբանության կենտրոնի տնօրեն Աննա Մելեխինան։
«Հանրահայտ փաստ է, որ քաղցր մթերքները փչացնում են կազմվածքը։ Զարմանալի չէ, որ շաքարավազից և շաքարավազ պարունակող մթերքներից հրաժարվելը շատերի կողմից դիտարկվում է որպես ավելորդ քաշից ազատվելու լավագույն միջոց։ Բայց հանկարծակի և առանց նախապատրաստվելու քաղցրավենիքը սննդակարգից վերացնելը կարող է տհաճ հետևանքների հանգեցնել»,– կարծում է Մելեխինան։
Սննդաբանը պարզաբանում է, որ շաքարին սովոր մարդիկ դրա օգտագործումից իրենց զրկելու դեպքում կարող են էներգիայի պակաս և ուժեղ դիսկոմֆորտ զգալ։
«Շաքարից կախվածությունը դեռ գիտականորեն ապացուցված չէ։ Բայց, միևնույն ժամանակ, մարդիկ, որոնք շատ քաղցր են օգտագործում, դրանից հրաժարվելու դեպքում ուժեղ դիսկոմֆորտ են զգում ինչպես զրկանքի համախտանիշի դեպքում։ Մարդը կարող է էներգիայի կորուստ զգալ, քանի որ քաղցր մթերքները նրա համար ածխաջրերի աղբյուր էին, որոնք, իրենց հերթին, էներգիայի հիմնական աղբյուր են հանդիսանում»,- պարզաբանում է սննդաբանը։
Ըստ Մելեխինայի` քաղցրից հրաժարվելու դեպքում առաջացած ածխաջրերի պակասն անհրաժեշտ է լրացնել. սկզբում օրգանիզմն անհրաժեշտ է ապահովել անհրաժեշտ նյութերով, նոր միայն նրանից որևէ բան «խլել»։ Տհաճ զգացողությունից խուսափելու համար սննդաբանը խորհուրդ է տալիս քաղցրը փոխարինել այնպիսի մթերքներով, որոնք բարդ ածխաջրեր են պարունակում։
«Մարդը թույլ է տալիս իրեն ուտել հաց, մակարոն, բրինձ և կարտոֆիլ, ինչը հանգեցնում է շաքարի ֆիզիոլոգիական պահանջմունքի նվազմանը, և նա իրեն լավ է զգում»,- ասել է Մելեխինան։
Նա ասել է, որ այդ մթերքների օգտագործումը թույլ կտա խուսափել շաքարային զրկանքի համախտանիշից։
