ԱՄՆ-ում երաժշտական աշխարհի առաջատար անուններից մի քանիսը մասնակցում են Blackout Tuesday-ին՝ միանալով աֆրոամերիկացի Ջորջ Ֆլոյդի մահից հետո անցկացվող բողոքի ցույցերի մասնակիցների՝ երկրում արմատական փոփոխությունների, հավասարության և ռասիզմի բացառման կոչերին, գրում է The Independent-ը։
«Մենք սևամորթ համայնքի հետ միասին դեմ ենք ռասիզմի, ֆանատիզմի և բռնության բոլոր դրսևորումներին: Մենք պետք է պայքարենք ռասիզմի, մոլեռանդության և բռնության դեմ։ Այժմ, առավել քան երբևէ, պետք է օգտագործենք մեր ձայնը մեր շրջապատում անարդարությունների մասին խոսելու համար»,- ասել է Columbia Records-ի նախագահ Ռոն Փերին։
Sony Music, Universal, Interscope, Motown, Kobalt և շատ այլ երաժշտական ընկերություններ հետևել են Columbia Records-ի օրինակին։
Ռիհանան համալրում է այն երգիչների շարքը, որոնք իրենց մասնակցությամբ կաջակցեն ակցիայի մասնակիցներին։
«Հետևելով, թե ինչպես են իմ մարդկանց սպանում, սիրտս անասելի ցավով է լցվում»,- գրել է Ռիհանան:
Բեյոնսեն, իր հերթին, Ինստագրամում տեսանյութ է հրապարակել, որտեղ երկրպագուներին կոչ է արել ստորագրել «Ջորջ Ֆլոյդի համար արդարություն» պահանջող հանրագիրը։
Մյուս աստղերի թվում են՝ Թինաշեն, Նիկ Քենոնը, Արիանա Գրանդեն, Հոլզին և այլք։