Լեգենդար ռեժիսոր Ռիդլի Սքոթը, որը Gucci նորաձևության տան հիմնադրի թոռ Մաուրիցիո Գուչիի սպանության մասին քրեական դրամա կնկարահանի, այս փուլում զբաղվում է դերասանական կազմի ընտրությամբ։
Ինչպես հաղորդում է Deadline-ը, երգչուհի և դերասանուհի Լեդի Գագան արդեն պայմանագիր է ստորագրել Gucci գերդաստանի սպանված ժառանգորդի կնոջ դերը կերտելու համար։ Դերասանական կազմը համալրելու համար MGM ամերիկյան մեդիաընկերությունն այժմ բանակցություններ է վարում դերասաններ Ռոբերտ Դե Նիրոյի, Ալ Պաչինոյի, Ջարեդ Լետոյի, Ադամ Դրայվերի, Ջեք Հյուսթոնի և Ռիվ Քարնիի հետ։
MGM-ը նախատեսում է արտադրությունը սկսել Սքոթի՝ «Վերջին մենամարտը» (The Last Duel) դրամատիկ ֆիլմի նկարահանումների ավարտից անմիջապես հետո։
Հաղորդվում է, որ Գուչիի սպանության մասին ֆիլմի սցենարը գրել է Ռոբերտո Բենտիվենյան և հիմնված է Սառա Գեյ Ֆորդենի «Գուչիի տունը․ սպանության սենսացիոն պատմություն, խելագարություն, հրապույր և ագահություն» (The House of Gucci: A Sensational Story of Murder, Madness, Glamour, and Greed) գրքի վրա:
Սքոթը որպես ռեժիսոր և պրոդյուսեր հանդես կգա կնոջ՝ Ջանինա Սքոթի հետ։
