Հայաստանի ազգային ֆիլհարմոնիկ նվագախումբը հանդիսատեսի առջև իր դռները կբացի արցախյան հերոսներին նվիրված համերգով: Այս մասին հայտնում են ՀՀ ԿԳՄՍ նախարարության հասարակայնության հետ կապերի եվ տեղեկատվության վարչությունից։
Դեկտեմբերի 11-ին կհնչի Արամ Խաչատրյանի մոնումենտալ «Զանգերով» սիմֆոնիան, որն ազգային աղետի դեմ համառ պայքարի մարմնավորում է։ Կհնչի նաև Ալեքսանդր Հարությունյանի «Շեփորի կոնցերտը» (մենակատար՝ Կիրիլ Սոլդատով, դիրիժոր՝ Էդուարդ Թոփչյան):
«Անհամբեր սպասում ենք այս համերգին, երբ համերգասրահը կրկին կլցվի մեր հավատարիմ ունկնդրի ջերմ ներկայությամբ: Ամբողջական նվագախմբով «Արամ Խաչատրյան» համերգասրահում վերջին անգամ ելույթ ենք ունեցել մարտի 13-ին՝ մոտ 9 ամիս առաջ: Դեկտեմբերի 11-ի համերգին մեր նվագախմբի մեծ բարեկամ, վիրտուոզ շեփորահար Կիրիլ Սոլդատովի հետ կատարելու ենք հայկական դասական կոմպոզիտորական արվեստի լավագույն ստեղծագործությունները: Մեծ խոնարհմամբ համերգը նվիրում ենք Արցախում կռված մեր հերոս տղաներին, նրանց սխրանքը միշտ վառ պիտի պահենք մեր սրտերում և այնպես ապրենք, որ արժանի լինենք նրանց անձնազոհ ոգուն»,- նշել է ՀԱՖՆ գեղարվեստական ղեկավար եւ գլխավոր դիրիժոր Էդուարդ Թոփչյանը:
ՀԱՖՆ-ը վերսկսում է նաեւ «Ուխտագնացություն դեպի Բեթհովեն» փառատոնի ծրագրերը: Բեթհովենի ծննդյան օրը՝ դեկտեմբերի 16-ին, կներկայացվեն մեծ կոմպոզիտորի թիվ 5 և 6, իսկ դեկտեմբերի 17-ին՝ թիվ 1 եւ 4 սիմֆոնիաները: Անտեսված չեն մնա նաև Ֆիլհարմոնիկի մանկահասակ ունկնդիրները. դեկտեմբերի 23-ից 26-ը՝ ժամը 19:00-ին, «Արամ Խաչատրյան» համերգասրահում կհնչեն հատվածներ Չայկովսկու հեքիաթային «Շչելկունչիկ» բալետից, սպասվում են նաեւ բազմաթիվ անակնկալներ:
Համերգների ընթացքում կպահպանվեն հակահամաճարակային բոլոր կանոնները:
