Keeping Up With the Kardashians իրապատում շոուի ամերիկահայ աստղ Քիմ Քարդաշյանը շոուի ավարտի առթիվ հաղորդավար Էնդի Քոհենի հետ հարցազրույցի ընթացքում հերքել է անձնական հարաբերությունների մասին լուրերը։ Զրույցը հեռարձակվել է KUWTK-ի YouTube-յան պաշտոնական ալիքում։
Անձնական կյանքին վերաբերող Քոհենի հարցերին ի պատասխան 40-ամյա հեռուստաաստղը նշել է, որ Քանյե Ուեսթից բաժանվելուց հետո իրեն վերագրվող հարաբերությունները CNN-ի հաղորդավար Վան Ջոնսի կամ ռեփ կատարող Մալումայի հետ իրականությանը չեն համապատասխանում։ Նա նշել է, որ Մայամիում մի քանի անգամ հանդիպել է ռեփ երաժիշտի հետ, իսկ Վանը նույնիսկ գրել է իրեն, որ այդ լուրերը հօգուտ իրեն են եղել՝ նոր ժամադրությունների թիվը կտրուկ ավելացել է:
«Բայց ես նրանցից ոչ ոքի հետ չեմ հանդիպում։ Մալումային մի քանի անգամ հանդիպել եմ Մայամիում․ նա լավ տղա է ․․․ իսկ Վանը նույնիսկ գրել է ինձ, որ իր նոր ժամադրությունների թիվը կտրուկ ավելացել է», – ասել Քարդաշյանը։
Տեսանյութում, որտեղ Քիմն անդրադառնում է իրեն վերագրվող նոր հարաբերություններին, նա նաև խոսել է ռեփեր Քանյե Ուեսթի հետ հարաբերությունների սկզբի մասին։ SKIMS, KKW Beauty և KKW Fragrance ապրանքանիշերի հիմնադիր և սեփականատեր հեռուստաստղը նշել է, որ Քրիս Համֆրիսից ամուսնալուծվելուց 6 ամիս անց զանգել է Քանյե Ուեսթին և ասել․ «Դու նույնիսկ չես զանգահարում, որ ասես «ես ճիշտ էի»»։
Քանյե Ուեսթի հետ զրույցից հետո Քիմը հանդիպել է նրա հետ, և հենց առաջին հանդիպմանն էլ զգացել է, որ ամեն բան հստակ է։
«Քանյեի հետ ամուսնությունն ու իմ երեխաները շատ իրական են, սիրով լի, և ես զգում եմ, որ դա իմ առաջին իրական ամուսնությունն էր»,- ասել է Քիմ Քարդաշյանը և հավելել, որ Քանյե Ուեսթից բաժանվելու պատճառները շատ են, սակայն նրանք շատ լավ կարողանում են կատարել համատեղ ծնողական պարտականությունները, քանի որ մինչ ամուսնանալը նախ ընկերներ են եղել։
