Դերասան Դոլֆ Լունդգրենը պատմել է, որ մի անգամ քիչ էր մնում կռվի բռնվեր Սիլվեստր Ստալոնեի հետ, մեջբերում է NME-ն։
Ըստ Լունդգրենի՝ «Անզսպելիները» ֆիլմի նկարահանման հրապարակում Ստալոնեն քննադատել է իր գործընկերոջը և խնդրել նրան մի քանի դուբլ անել: «Նա շատ խիստ էր ինձ հետ «Անզսպելիների» տեսարանում, որի ժամանակ բղավեց ինձ վրա ամբողջ անձնակազմի ներկայությամբ և ստիպեց ինձ մոտ 20 դուբլ անել»,- պատմել է դերասանը:
Լունդգրենը խոստովանել է, որ ընդմիջման ժամանակ զանգահարել է կնոջն ու ասել, որ պատրաստ է հարվածել Ստալոնեին նման պահվածքի համար։ Սակայն դա կռվի չի վերաճել․ Ստալոնեն մոտեցել է գործընկերոջը և ներողություն խնդրել քննադատության համար։
«Տարիների ընթացքում մենք մի քանի բախում ենք ունեցել, բայց ի՞նչ կարող եմ ասել, նա խենթ իտալացի է: Կարծում եմ՝ նա գիտի, որ ես միշտ հարգել և սիրել եմ իրեն, և կարծում եմ, որ դրա համար էլ մենք դեռ ընկերներ ենք»,- ասել է արտիստը։
Ավելի վաղ հաղորդվել էր, որ Դոլֆ Լունդգրենն արդեն ութ տարի է՝ պայքարում է քաղցկեղի դեմ։