Հայտնի հաղորդավար Ժակը՝ Հակոբ Պապիկյանը, ում հետ սեպտեմբերին Հանրային հեռուստաընկերությունը դադարեցրել էր համագործակցությունը, ShowBiz.am կայքի հետ զրույցում կիսվել է՝ ինչ նոր նախագծեր ու ծրագրեր ունի ապագայում:
«Յուրաքանչյուր մարդ, մասնագետ պետք է աշխատի իր սեփական մասշտաբների վրա, որպեսզի երբեք չսահմանափակվի կոնկրետ հաստատությամբ այլ դիտարկվի, որպես կայացած հանրային կերպար, իր գործի լավ մասնագետ, ինքնաբավ և իր տեսակով որոշակիորեն առանձնացող:
Սա երկրորդ աշխատանքային փուլն էր Հանրայինում: Մոտ 10 տարի առաջ, ես այնտեղ վարում էի «Բենեֆիս» նախագիծը, որի նաև մտահաղացման հեղինակն էի հանդիսանում: Բոլոր տարիների ընթացքում, տևական համագործակցություն եմ ունեցել մի շարք հեռուստաընկերությունների հետ: Հիմա էլ կարող են լինեն նոր նախագծեր որևէ հեռուստաընկերությունում, արդեն նոր գաղափարներ են եփվում: Վստահ եմ՝ ժամանակը ամեն ինչ և ամեն մեկին իր ճիշտ տեղն է գցում»,- մեզ հետ կիսվում է հաղորդավարը։
Ժակի ներկայիս զբաղվածությունը քիչ չէ․ «Արդեն զբաղվում եմ «Ռադիո Վան»-ի երաժշտական նախագծերի պրոդյուսինգով, որոնք շեշտադրված առանձնահատկություն ունեն՝ բացառապես կենդանի հնչողություն, նոր հնարավորությունների և բացահայտումների հնարավորությունների ստեղծում։ Դրանք են՝ «Van Music Awards»՝ ամենամյա երաժշտական մրցանակաբաշխութունը, «Komitas restart»՝ նվիրված Կոմիտասի 150-ամյա հոբելյանին, «Unplugged»՝ համերգների շարքը:
Բացի այդ, արդեն աշխատում եմ, իր տեսակի մեջ յուրահատուկ՝ «Iammedia» համահայկական լրատվական նոր հարթակում՝ որպես ստեղծագործական մասի տնօրեն և հաղորդավար»:
Հիշեցնենք, որ օրեր առաջ Ժակը ֆեյսբուքյան էջում գրառում էր կատարել իր՝ աշխատանքից հեռացման մասին։
Հեղինակ՝ Տաթևեր Լազարյան
