Մեծ Բրիտանիայի թագուհուն նկատել են մեքենա վարելիս իր ագարակի տարածքում: Ինչպես գրում է Daily Mail-ը, Էլիզաբեթ Երկրորդին մեքենայի ղեկին նկատել են հանգստյան օրերին Սենդրինգհեմի կալվածք կատարած անակնկալ այցի ժամանակ:
95-ամյա թագուհին, որը Վինձորի ամրոցում է բնակվելիս եղել ամուսնու՝ արքայազն Ֆիլիպի մահից ի վեր, ուրբաթ ուղղաթիռով մեկնել է Նորֆոլկի իր տուն և նախատեսվում է, որ մեկ օր էլ դեռ կմնա այնտեղ:
Միապետին մեքենայում երկու տղամարդ է ուղեկցել, որոնցից մեկը ձիերի և ձիարշավի հարցով նրա խորհրդականն է: Թագուհին հատուկ հետաքրքրվածություն է ցուցաբերում ձիաբուծության գործում:
Նրան հարյուրավոր մրցարշավային ձիեր են պատկանել տարիների ընթացքում, որոնք ավելի քան 1600 հաղթանակ են գրանցել ձիարշավներում:
